रतन सुत्त

𑀭𑀢𑀦 𑀲𑀼𑀢𑁆𑀢𑀁
𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀢𑀣𑀸𑀕𑀢𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂, 𑀮𑁄𑀓𑀢𑁆𑀣𑀘𑀭𑀺𑀬𑀁 𑀜𑀸𑀢𑀢𑁆𑀣𑀘𑀭𑀺𑀬𑀁 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀦𑁆𑀢𑀺 𑀢𑀺𑀲𑁆𑀲𑁄 𑀘𑀭𑀺𑀬𑀸𑀬𑁄, 𑀧𑀘𑁆𑀙𑀺𑀫𑀪𑀯𑁂 𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀁, 𑀚𑀸𑀢𑀺𑀁, 𑀅𑀪𑀺𑀦𑀺𑀓𑁆𑀔𑀫𑀦𑀁, 𑀧𑀥𑀸𑀦𑀘𑀭𑀺𑀬𑀁, 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀫𑀸𑀭𑀯𑀺𑀚𑀬𑀁, 𑀲𑀩𑁆𑀩𑀜𑁆𑀜𑀼𑀢—𑀜𑁆𑀜𑀸𑀡𑀧𑁆𑀧𑀝𑀺𑀯𑁂𑀥𑀁, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁, 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’𑀢𑀺 𑀲𑀩𑁆𑀩𑁂𑀧𑀺 𑀫𑁂 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀯𑁂𑀲𑀸𑀮𑀺𑀬𑀸 𑀢𑀻𑀲𑀼 𑀧𑀸𑀓𑀸𑀭𑀦𑁆𑀢𑀭𑁂𑀲𑀼 𑀢𑀺𑀬𑀸𑀫𑀭𑀢𑁆𑀢𑀺𑀁 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀓𑀸𑀭𑀼𑀜𑁆𑀜𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑁇

𑀓𑁄𑀝𑀻𑀲𑀢𑀲𑀳𑀲𑁆𑀲𑁂𑀲𑀼, 𑀘𑀓𑁆𑀓𑀯𑀸𑀮𑁂𑀲𑀼 𑀤𑁂𑀯𑀢𑀸 𑁇
𑀬𑀲𑁆𑀲𑀸𑀡𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀬𑀜𑁆𑀘 𑀯𑁂𑀲𑀸𑀮𑀺𑀬𑀸 𑀧𑀼𑀭𑁂 𑁈
𑀭𑁄𑀕𑀸𑀫𑀦𑀼𑀲𑁆𑀲𑀤𑀼𑀩𑁆𑀪𑀺𑀓𑁆𑀔, 𑀲𑀫𑁆𑀪𑀽𑀢𑀁 𑀢𑀺𑀯𑀺𑀥𑀁 𑀪𑀬𑀁 𑁇
𑀔𑀺𑀧𑁆𑀧𑀫𑀦𑁆𑀢𑀭𑀥𑀸𑀧𑁂𑀲𑀺, 𑀧𑀭𑀺𑀢𑁆𑀢𑀁 𑀢𑀁 𑀪𑀡𑀸𑀫 𑀳𑁂 𑁈

𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀺,
𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂 𑁇
𑀲𑀩𑁆𑀩𑁂𑀯 𑀪𑀽𑀢𑀸 𑀲𑀼𑀫𑀦𑀸 𑀪𑀯𑀦𑁆𑀢𑀼,
𑀅𑀣𑁄𑀧𑀺 𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀼 𑀪𑀸𑀲𑀺𑀢𑀁 𑁈𑁧𑁈

𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂,
𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬 𑁇
𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀳𑀭𑀦𑁆𑀢𑀺 𑀬𑁂 𑀩𑀮𑀺𑀁 𑁇
𑀢𑀲𑁆𑀫𑀸 𑀳𑀺 𑀦𑁂 𑀭𑀓𑁆𑀔𑀣 𑀅𑀧𑁆𑀧𑀫𑀢𑁆𑀢𑀸 𑁈𑁨𑁈

𑀬𑀁𑀓𑀺𑀜𑁆𑀘𑀺 𑀯𑀺𑀢𑁆𑀢𑀁 𑀇𑀥 𑀯𑀸 𑀳𑀼𑀭𑀁 𑀯𑀸,
𑀲𑀕𑁆𑀕𑁂𑀲𑀼 𑀯𑀸 𑀬𑀁 𑀭𑀢𑀦𑀁 𑀧𑀡𑀻𑀢𑀁 𑁇
𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦,
𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁 𑁇 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁩𑁈

𑀔𑀬𑀁 𑀯𑀺𑀭𑀸𑀕𑀁 𑀅𑀫𑀢𑀁 𑀧𑀡𑀻𑀢𑀁,
𑀬𑀤𑀚𑁆𑀛𑀕𑀸 𑀲𑀓𑁆𑀬𑀫𑀼𑀦𑀻 𑀲𑀫𑀸𑀳𑀺𑀢𑁄 𑁇
𑀦 𑀢𑁂𑀦 𑀥𑀫𑁆𑀫𑁂𑀦 𑀲𑀫𑀢𑁆𑀣𑀺 𑀓𑀺𑀜𑁆𑀘𑀺,
𑀇𑀤𑀫𑁆𑀧𑀺 𑀥𑀫𑁆𑀫𑁂 𑀭𑀢𑀦𑀁 𑀧𑀡𑀻𑀢𑀁 𑁇 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁪𑁈

𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄 𑀧𑀭𑀺𑀯𑀡𑁆𑀡𑀬𑀻 𑀲𑀼𑀘𑀺𑀁,
𑀲𑀫𑀸𑀥𑀺–𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀼 𑁇
𑀲𑀫𑀸𑀥𑀺𑀦𑀸 𑀢𑁂𑀦 𑀲𑀫𑁄 𑀦 𑀯𑀺𑀚𑁆𑀚𑀢𑀺,
𑀇𑀤𑀫𑁆𑀧𑀺 𑀥𑀫𑁆𑀫𑁂 𑀭𑀢𑀦𑀁 𑀧𑀡𑀻𑀢𑀁 𑁇
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁫𑁈

𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀁 𑀧𑀲𑀝𑁆𑀞𑀸,
𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺 𑁇
𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀲𑀼𑀕𑀢𑀲𑁆𑀲 𑀲𑀸𑀯𑀓𑀸,
𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁 𑁇
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁬𑁈

𑀬𑁂 𑀲𑀼𑀧𑁆𑀧𑀬𑀼𑀢𑁆𑀢𑀸 𑀫𑀦𑀲𑀸 𑀤𑀮𑁆𑀳𑁂𑀦,
𑀦𑀺𑀓𑁆𑀓𑀸𑀫𑀺𑀦𑁄 𑀕𑁄𑀢𑀫𑀲𑀸𑀲𑀦𑀫𑁆𑀳𑀺 𑁇
𑀢𑁂 𑀧𑀢𑁆𑀢𑀺𑀧𑀢𑁆𑀢𑀸 𑀅𑀫𑀢𑀁 𑀯𑀺𑀕𑀳𑁆𑀬,
𑀮𑀤𑁆𑀥𑀸 𑀫𑀼𑀥𑀸 𑀦𑀺𑀩𑁆𑀩𑀼𑀢𑀺𑀁 𑀪𑀼𑀜𑁆𑀚𑀫𑀸𑀦𑀸 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁭𑁈

𑀬𑀣𑀺𑀦𑁆𑀤𑀔𑀻𑀮𑁄 𑀧𑀞𑀯𑀺𑀲𑁆𑀲𑀺𑀢𑁄 𑀲𑀺𑀬𑀸,
𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑁇
𑀢𑀣𑀽𑀧𑀫𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀸𑀫𑀺,
𑀬𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑁂𑀘𑁆𑀘 𑀧𑀲𑁆𑀲𑀢𑀺 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁮𑁈

𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀪𑀸𑀯𑀬𑀦𑁆𑀢𑀺,
𑀕𑀫𑁆𑀪𑀻𑀭𑀧𑀜𑁆𑀜𑁂𑀦 𑀲𑀼𑀤𑁂𑀲𑀺𑀢𑀸𑀦𑀺 𑁇
𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁 𑀧𑀫𑀢𑁆𑀢𑀸,
𑀦 𑀢𑁂 𑀪𑀯𑀁 𑀅𑀝𑁆𑀞𑀫–𑀫𑀸𑀤𑀺𑀬𑀦𑁆𑀢𑀺 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁯𑁈

𑀲𑀳𑀸𑀯𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀤𑀸𑀬,
𑀢𑀬𑀲𑁆𑀲𑀼 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀺 𑁇
𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘,
𑀲𑀻𑀮𑀩𑁆𑀯𑀢𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺 𑁇
𑀘𑀢𑀽𑀳–𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄,
𑀙𑀘𑁆𑀘𑀸𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩𑀓𑀸𑀢𑀼𑀁 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁦𑁈

𑀓𑀺𑀜𑁆𑀘𑀸𑀧𑀺 𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀧𑀸𑀧𑀓𑀁,
𑀓𑀸𑀬𑁂𑀦 𑀯𑀸𑀘𑀸 𑀉𑀤 𑀘𑁂𑀢𑀲𑀸 𑀯𑀸
𑀅𑀪𑀩𑁆𑀩𑁄 𑀲𑁄 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀸𑀬
𑀅𑀪𑀩𑁆𑀩𑀢𑀸 𑀤𑀺𑀝𑁆𑀞𑀧𑀤𑀲𑁆𑀲 𑀯𑀼𑀢𑁆𑀢𑀸 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁧𑁈

𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣 𑀨𑀼𑀲𑁆𑀲𑀺𑀢𑀕𑁆𑀕𑁂,
𑀕𑀺𑀫𑁆𑀳𑀸𑀦 𑀫𑀸𑀲𑁂 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂 𑁇
𑀢𑀣𑀽𑀧𑀫𑀁 𑀥𑀫𑁆𑀫𑀯𑀭𑀁 𑀅𑀤𑁂𑀲𑀬𑀺,
𑀦𑀺𑀩𑁆𑀩𑀸𑀦𑀕𑀸𑀫𑀺𑀁 𑀧𑀭𑀫𑀁 𑀳𑀺𑀢𑀸𑀬 𑁇
𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁨𑁈

𑀯𑀭𑁄 𑀯𑀭𑀜𑁆𑀜𑀽 𑀯𑀭𑀤𑁄 𑀯𑀭𑀸𑀳𑀭𑁄,
𑀅𑀦𑀼𑀢𑁆𑀢𑀭𑁄 𑀥𑀫𑁆𑀫𑀯𑀭𑀁 𑀅𑀤𑁂𑀲𑀬𑀺 𑁇
𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁩𑁈

𑀔𑀻𑀡𑀁 𑀧𑀼𑀭𑀸𑀡𑀁 𑀦𑀯𑀁 𑀦𑀢𑁆𑀣𑀺 𑀲𑀫𑁆𑀪𑀯𑀁,
𑀯𑀺𑀭𑀢𑁆𑀢𑀘𑀺𑀢𑁆𑀢𑀸𑀬𑀢𑀺𑀓𑁂 𑀪𑀯𑀲𑁆𑀫𑀺𑀁 𑁇
𑀢𑁂 𑀔𑀻𑀡𑀩𑀻𑀚𑀸 𑀅𑀯𑀺𑀭𑀼𑀮𑁆𑀳𑀺𑀘𑁆𑀙𑀦𑁆𑀤𑀸,
𑀦𑀺𑀩𑁆𑀩𑀦𑁆𑀢𑀺 𑀥𑀻𑀭𑀸 𑀬𑀣𑀸𑀬𑀁 𑀧𑀤𑀻𑀧𑁄 𑁇
𑀇𑀤𑀫𑁆𑀧𑀺 𑀲𑀁𑀖𑁂 𑀭𑀢𑀦𑀁 𑀧𑀡𑀻𑀢𑀁,
𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁪𑁈

𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀺,
𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂 𑁇
𑀢𑀣𑀸𑀕𑀢𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁,
𑀩𑀼𑀤𑁆𑀥𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁫𑁈

𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀺,
𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂 𑁇
𑀢𑀣𑀸𑀕𑀢𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁,
𑀥𑀫𑁆𑀫𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁬𑁈

𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀺,
𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂 𑁇
𑀢𑀣𑀸𑀕𑀢𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁
𑀲𑀁𑀖𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀼 𑁈𑁧𑁭𑁈

𑀲𑀁𑀧𑀸𑀤𑀦-𑀟𑀸 𑀲𑀁𑀖𑀧𑁆𑀭𑀓𑀸𑀰 𑀤𑀼𑀟𑁆𑀟𑁂

रतन सुत्तं

पणिधानतो पट्ठाय तथागतस्स दस पारमियो, दस उपपारमियो, दस परमत्थपारमियो’ति समतिंस पारमियो पञ्च महापरिच्चागे, लोकत्थचरियं ञातत्थचरियं बुद्धत्थचरियन्ति तिस्सो चरियायो, पच्छिमभवे गब्भवोक्कन्तिं, जातिं, अभिनिक्खमनं, पधानचरियं, बोधिपल्लङ्के मारविजयं, सब्बञ्ञुत—ञ्ञाणप्पटिवेधं, धम्मचक्कप्पवत्तनं, नवलोकुत्तरधम्मे’ति सब्बेपि मे बुद्धगुणे आवज्जेत्वा वेसालिया तीसु पाकारन्तरेसु तियामरत्तिं परित्तं करोन्तो आयस्मा आनन्दत्थेरो विय कारुञ्ञचित्तं उपट्ठपेत्वा ।

कोटीसतसहस्सेसु, चक्कवालेसु देवता ।

यस्साणं पटिग्गण्हन्ति, यञ्च वेसालिया पुरे ।।

रोगामनुस्सदुब्भिक्ख, सम्भूतं तिविधं भयं ।

खिप्पमन्तरधापेसि, परित्तं तं भणाम हे ।।

यानीध भूतानि समागतानि,

भुम्मानि वा यानि व अन्तलिक्खे ।

सब्बेव भूता सुमना भवन्तु,

अथोपि सक्कच्च सुणन्तु भासितं ।।१।।

तस्मा हि भूता निसामेथ सब्बे,

मेत्तं करोथ मानुसिया पजाय ।

दिवा च रत्तो च हरन्ति ये बलिं ।

तस्मा हि ने रक्खथ अप्पमत्ता ।।२।।

यंकिञ्चि वित्तं इध वा हुरं वा,

सग्गेसु वा यं रतनं पणीतं ।

न नो समं अत्थि तथागतेन,

इदम्पि बुद्धे रतनं पणीतं । एतेन सच्चेन सुवत्थि होतु ।।३।।

खयं विरागं अमतं पणीतं,

यदज्झगा सक्यमुनी समाहितो ।

न तेन धम्मेन समत्थि किञ्चि,

इदम्पि धम्मे रतनं पणीतं । एतेन सच्चेन सुवत्थि होतु ।।४।।

यं बुद्धसेट्ठो परिवण्णयी सुचिं,

समाधि–मानन्तरिकञ्ञमाहु ।

समाधिना तेन समो न विज्जति,

इदम्पि धम्मे रतनं पणीतं ।

एतेन सच्चेन सुवत्थि होतु ।।५।।

ये पुग्गला अट्ठसतं पसट्ठा,

चत्तारि एतानि युगानि होन्ति ।

ते दक्खिणेय्या सुगतस्स सावका,

एतेसु दिन्नानि महप्फलानि ।

इदम्पि संघे रतनं पणीतं ।

एतेन सच्चेन सुवत्थि होतु ।।६।।

ये सुप्पयुत्ता मनसा दल्हेन,

निक्कामिनो गोतमसासनम्हि ।

ते पत्तिपत्ता अमतं विगह्य,

लद्धा मुधा निब्बुतिं भुञ्जमाना ।

इदम्पि संघे रतनं पणीतं,

एतेन सच्चेन सुवत्थि होतु ।।७।।

यथिन्दखीलो पठविस्सितो सिया,

चतुब्भि वातेहि असम्पकम्पियो ।

तथूपमं सप्पुरिसं वदामि,

यो अरियसच्चानि अवेच्च पस्सति ।

इदम्पि संघे रतनं पणीतं,

एतेन सच्चेन सुवत्थि होतु ।।८।।

ये अरियसच्चानि विभावयन्ति,

गम्भीरपञ्ञेन सुदेसितानि ।

किञ्चापि ते होन्ति भुसं पमत्ता,

न ते भवं अट्ठम–मादियन्ति ।

इदम्पि संघे रतनं पणीतं,

एतेन सच्चेन सुवत्थि होतु ।।९।।

सहावस्स दस्सनसम्पदाय,

तयस्सु धम्मा जहिता भवन्ति ।

सक्कायदिट्ठि विचिकिच्छितञ्च,

सीलब्वतं वापि यदत्थि किञ्चि ।

चतूह–पायेहि च विप्पमुत्तो,

छच्चाभिठानानि अभब्बकातुं ।

इदम्पि संघे रतनं पणीतं,

एतेन सच्चेन सुवत्थि होतु ।।१०।।

किञ्चापि सो कम्मं करोति पापकं,

कायेन वाचा उद चेतसा वा

अभब्बो सो तस्स पटिच्छादाय

अभब्बता दिट्ठपदस्स वुत्ता ।

इदम्पि संघे रतनं पणीतं,

एतेन सच्चेन सुवत्थि होतु ।।११।।

वनप्पगुम्बे यथ फुस्सितग्गे,

गिम्हान मासे पठमस्मिं गिम्हे ।

तथूपमं धम्मवरं अदेसयि,

निब्बानगामिं परमं हिताय ।

इदम्पि बुद्धे रतनं पणीतं,

एतेन सच्चेन सुवत्थि होतु ।।१२।।

वरो वरञ्ञू वरदो वराहरो,

अनुत्तरो धम्मवरं अदेसयि ।

इदम्पि बुद्धे रतनं पणीतं,

एतेन सच्चेन सुवत्थि होतु ।।१३।।

खीणं पुराणं नवं नत्थि सम्भवं,

विरत्तचित्तायतिके भवस्मिं ।

ते खीणबीजा अविरुल्हिच्छन्दा,

निब्बन्ति धीरा यथायं पदीपो ।

इदम्पि संघे रतनं पणीतं,

एतेन सच्चेन सुवत्थि होतु ।।१४।।

यानीध भूतानि समागतानि,

भुम्मानि वा यानि व अन्तलिक्खे ।

तथागतं देवमनुस्सपूजितं,

बुद्धं नमस्साम सुवत्थि होतु ।।१५।।

यानीध भूतानि समागतानि,

भुम्मानि वा यानि व अन्तलिक्खे ।

तथागतं देवमनुस्सपूजितं,

धम्मं नमस्साम सुवत्थि होतु ।।१६।।

यानीध भूतानि समागतानि,

भुम्मानि वा यानि व अन्तलिक्खे ।

तथागतं देवमनुस्सपूजितं

संघं नमस्साम सुवत्थि होतु ।।१७।।

संपादन-डॉ  संघप्रकाश दुड्डे